Kan mi ékri sa mi pé panss l’éspor :

Noute sossyété lé vyolan, èl lé mèm grossyé souvan défoi, èl i manke solidarité, si lo fair-play sé konm ki diré in prinssip épi in règ de vi, fé spéssyalman pou l’éspor, ni pé pa dir sa i marsh a tou lé kou, san pour san, é léspor lé toultan dann lo kokon lo fair-play… Fransh vérité ni yèmré déssèrtin défo noute sossyété i trouv pa zot plass dann bann manifèstassion léspor, épi dann l’antouraz bann lésportif é dann lo monde léspor an zénéral. Ni yèmré mé ni koné bien sa sé pa in n’afèr k’i marsh a toulékou…

Noute toute i koné sak la spass zé dé zil. Noute toute néna noute l’opinyon la dsi. Nou la vi sak la spassé dann la télé é nou la antann toute kalité komantèr lé z’inn é lé zot la fé. Nou la suiv lo bann ralé-poussé préss an dirèk si la pa dann télé é mèm dann bann video an sirkilassion. Astèr ni pé panss toute sak ni vé… sirtou pa ké la moral léspor i protèz bann maniféstassion ésportiv par rapor déssèrtin vilin défo noute sossyété, sansa par rapor bann kouak l’arivé.

Astèr i fo pa ni amontr lo doi bann lésportif — mèm sak la vni avèk zot — ninporte kèl péi dann loséan indien. Kissoi bann Rényoné, kissoi bann moune Madégaskar, bann Morissien épi lé zot, sak lété la pou in gran somenn manifèstassion konmsa. Dann zé dé zil, ni vé, ni vé pa néna touzour inn-dé kouak é bien antandi nora touzour dann l’avnir konm l’avé dann passé… I rèss kant mèm in gran somenn kontak rante noute zénèss indianosséanik… I rèss sirman dan la tète é dann kèr lé z’inn é lé z’ot kalité souvnir zot i obli ar pa zamé pars sa va akonpagn azot toute zot vi.

Astèr néna in n’afèr ni koné, mèm si néna règloman pou ankadr in manifèstassion osinonsa in l’aktivité, nou lé siréssèrtin mèm si bann règloman lé bien fé, ni pé dir zamé o gran zamé lo règloman sar san pour san bien apliké. Lé konmsa ké ni vé osinonsa ké ni vé pa.

A bon antandèr, salu.

Justin