Mé déza li di anou li lé dann in mission laba dann l’Amérik avèk in gran proféssèr i apèl David Vine épi in om de loi ékrivin Philippe Sands, la vni issi La Rényon dann komansman l’ané épi in l’assossyasion bien koni é bien réputé i apèl Humann Wright Watch — i avèye si lo bann droi imin lé réspékté é si lé pa li dénonss sa dovan l’opinion piblik mondial.

Mwin pèrsonèlman mi rotien zordi lo pti fraz li la di é mwin la marke an-o la. Pou kossa ? Pars lo pèp chagossien la passé dopi sinkantan é li néna pou domann réparassion toute sak lafé d’mal lo pèp. Dann kèr l’Amérik li di lo fraz mwin la marke an-o la é sa la pass dann in gran zoinal amérikin son pèp la soufèr bonpé par bann zamérikin, bann zanglé épi d’ote konpliss la zamé marke zot solidarité par raporte lo pèp Chagos.

Par l’fète so matin granmatin mwin t’apré rolir in pé dé-troi boute liv Philippe Sands — Dernyé koloni — é toudinkou mi apèrssoi GB la zoué in rol ankor pli malfondé ké bann z’USA. Pou bonpé d’shoz mé sirtou pou lo déportassion bann z’iloi : dann liv Philippe Sands (p 70-dézyèm paragraf) : Bann zamérikin téi vé k’i vide solman Diégo-Garcia par rapor son zabitan, mé pa lé zot zil konm Salomon, Trois frèr épi Perhos Banos é pou lézot sé bann zanglé zot mèm la déssidé (déklarassion lo haut commissaire britannique dann Port-Louis-mèm liv p 70 promyé paragraf). Siréssèrtin si bannn zanglé l’avé pa fé sa, la vi lo pèp shagossien nora pa été sak ni koné.

Mézami, mi koné in bonpé zékrivèr-zékrivèz la ékrir dsu Chagos mé mi panss sèryèzman, i fo, nou lé klèr dsu toute sak la spassé é kissa la zoué lo sal rol pars lé tro fassil kan ou sé bann gran péi malmène konmsa in péi kréol, konm banna la malméné.

Sa i vé pa dir Z’Usa lé inossan é sé pou sa Olivier Bancoult la parti di laba dann kèr l’Amérik sak li la parti dir ; ni koné Olivier sé in boug na kouraz é li la pa pèr di la vérité. Lo zandarm lo mond la fé l’anprofitèr é la fé pass bann chagossien sinkantan d’malèr é konm Bancoult i di : « si ou la fé d’tor demoune sé ou k’i doi réparé »

A bon antandèr, salu.

Justin