Dann son tousèl-la li antan pa in grin dézord, apark inndé sarèt an fèr i fé « klok ! klok ! » an distans-an-distans. Partou koté li lé pli trankil ke dann simtir.
Anparlan simtir, alapa Tikok i antan parèy in moun i mars déyèr li ! Son sové i dobout rèd an plim bourik dési son tèt ! Son kèr i bat dann son do. Tikok i mars vit minm. Déyèr li dézord lo pa i vien minm, i suiv ali. Tikok i mèt dovan ; lo pa i mèt déyèr li minm, i larg pa li : « Tok ! Tok ! Tok ! Tok ! » Mandoné, Tikok i pran in lélan, i kour. Lo pa i kous déyèr li : « Potok ! Potok ! Potok ! Potok ! » Tikok i gingn pi anparé, i kri lasasin : « Osékour ! Osékour ! Zam pirgatoir lé déyèr moin ! Osékour ! » Li rant dann la kour in moun. In Madanm i rouv la port, i dobout desi patport an blouz èk in fanal dann son min. I domann ali :
« Kosa l’arivé, mon zanfan ?
– Lavé in… lavé… lavé in zam… in zam pirgatoir déyèr moin… Té… té i suiv amoin partou.
– Ou la vi ali ? »
– Non ! Moin la antandi, té i fé : « Tok ! Tok ! Tok ! »
Lo bononm té po boir kafé dann la kizine i ariv, i di ali konmsa, i di : « Anon amont amoin ousa i lé ! »

Tikok i aminn ali dovan laba desi somin. Lèrk Tikok i mars, lo boug i antan « Tok ! Tok ! Tok ! ». povréman déyèr Tikok. Li domann lo marmay : « Ou i antan ali akor, ou la ? »
Tikok inpé kami, i réponn, i di : « Mésoman éskiz amoin misié, mésoman moin té i kroi… ».

Eya ! Lo marmay té i kalkil zam pirgatoir, aléoir perméab son gromèr té i tap dann son talon atèr… Konm dékoi zam pirgatoir èk la pèr, dé kouzin zermin ! Lo dé i mars ansanm ! Fé fane la pèr, zam pirgatoir i fane ansanm.

Christian Fontaine