Lo moun la ékri liv-la i travaye konm amontrèr l’inivèrsité La Rényon, li lé galman zournalis épi ékrivèr é li lé koni konm éspésyalis bann rolasyon rant bann z’étazini épi La Répiblik Kiba. Lo tit konpllé lo liv sé :

Double morale-Cuba, l’Union européenne et les droits de l’homme

Pou kosa in liv la ? Pars moi d’désanm 1996, l’inyon éropéène la désid fé son l’alignman avèk la politik la ène bann z’étazini par raport la Répiblik kiba. Lo sèl krime péi-la la komète sé ké li la vanj pou rash avèk lé’zarm son souvrènté nasyonal dann son révolisyon l’ané 1959. An pliské sa, li la shoizi in sistèm sosyal épi ékonomik k’i dévir lo do avèk lo sistèm kapitalis. Arzout èk sa Kiba la pa rokil dovan bann z’atak l’amérik l’amenn an sou-min kont li épi son dirizan prinsipal Fidèl Castro-Dopi 1959 la mate pa moins 600 z’atanta kont dirizan-la.

L’ané 2003 l’Inyon Eropéène la désid pran kont kiba bann sanksyon dsi lo poinn vizé d-lékonomi épi diplomasi. Pou kèl rézon zot la fé sa ? Pars té i roprosh lo péi son sityasion par raport lo bann droi imin é sirtou l’aréstasyon soisant kinz z’azan dann sèrvis in péi étranzé. Na arienk kont kiba la désid bann sanksyon konmsa, pa kont bann péi lo droi imin la pa réspékté ditou, pli pir zot i s’anfoutsa. Parl pi dsi la késtyonn lo droi bann fanm épi bann z’anfan !

Poitan la sityasion par raport bann droi dann kiba nana bokou moins l’anspèk ké dann in bonpé péi nana dsi la tèr mèm dann l’inyon éropéène èl mèm. Salim Lamrani la bien étidyé bann rapor Amnesty Internasyonal é bann rapor-la i amontr bien nana in bonpé roprosh pou fé pou in bonpé péi, mé pou kiba la pa konmsa. Poitan Amnesty internasyonal, i pé dir, la pa konplis par rapotrt la répiblik kiba é konm ONG li tienbo bonpé son l’indépandans pou ziz dsi la sityasion tout bann péi par raport bann droi imin.

Liv-la zot i pé lir sa san larg ali dopi komansman ziska la finisyon é amenn azot pou aprésyé in fason korèk la sityasion dann Kiba. Arzout èk sa zot va trouv dann liv la tout ransègnman pou trouv lo bann dokiman zot la bézoin pou aprésyé par zot mèm la sityasion la Répiblik Kiba épi tout lé z’ot péi. Pou zot ziz si zot i vé, lo sèryé épi l’obzèktivité lo travaye fé. Biensir Salim Lamrani nana l’amour pou la tèr kibaine mé sa i anpèsh pa li oir lé shoz korèktoman konm zot i lé.

Georges Gauvin

NB Pou zot ashète liv-la é zot i pé pran kontak dsi l’internet avèk Georges Gauvin :
[email protected]
d’ot liv Salim Lamrani : Cuba-Les médias face au défi de l’impartialité ; Cuba-parole à la défense ; Fidel Castro, héros des déshérités.