Navé in marmay lékol

Nou té kri ali « Siklone ». Té drol.
In m’ti krime, in lèspès ravazër
Navé son fason siklone, mé san fè war ‘war, té kan minm bonkër.

Té ! Lika,
Di pa ton marmay lé komor.
Di pa èk domoun k’li lé tor.
Ton zanfan sar gran,
Pa toktok, lé minm tro intélizan.
Tap pa li - koz sanm li
Ton marmay va ’nir drwat.
« Kozman véli konsèrv dann bwat. »

Navé inn ti fi la mok
Té inm garson, té ouv son kër konmsi té inn mok.
In m’tit zazakèl, in lèspès pitin,
Ti fi-là, san konprann, té rod in dèstin, in somin.

Té ! banna,
Di pa ti fi-là lé souyone,
Di pa sanm zot, ti fi là lété bone.
Ti fi-là va ni gran, sar koni.
Pa toktok, la tro véki.
Zir pa èl - Esplik aèl.
É in zour v’arni drwat.
« Kozman véli konsèrv dann bwat. »

In boug atèr dann somin Bonzanfan,
Domoun san kër, i di ali « SDF, sort dovan ».
Toultan boug an luil, in lèspès klosar,
Mé boug-là, dan son kër, navé in drol zistwar.

Té ! lo frèr,
Koz pa sanm li konm lo syin.
Di pa sanm domoun k’li arprézant riyin.
Boug-là, dan l’tan, lété in gran,
Epi, la sap dann somin, la pèrd la sans. Lé argrétan.
Alor, akiz pa li - konprann ali.
E in zour v’arni drwat.
« Kozman véli konsèrv dann bwat. »

Navé in fonnkézër san nom. Té pas son tan dann bar.
Groblan i di ali « ton kozé in barok pou bann nwar ».
Té inn planèt, in lèspès grobizar,
Mé boug-là, dan son zyé, dan son kër, navé pwinn fénwar.
Navé riyink in léspwar.

Té ! groblan,
Soulang pa mwin. Ton kozman konm sabouk si mon rin .
Nou pi dan l’tan Lèsklavaz konm dann tan madanm Débasin.
Mon kozé, afors sobat, v’arni gran.
Mwin pa toktok, na arvni konm lontan.
Moukat pa mwin groblan. Aou kréol, sobat sanm mwin.
Tansyon ! In zour, mon kozé v’arni drwat.
« Kozman véli i konsèrv dann bwat. »

Mon kozman véli, mon kozman léspwar
Pou inn tolérans, pou giny byin war,
In sobat pou mon lang,
In pé piman si mon mang.

Babou B’Jalah
11 févrié 2000, Bériv, Tanpon

(*) Kozman véli konsèrv dann bwat, sé inn manyèr d’dir k’lèspwar i fé viv, k’lèspwar i done anou kouraz pou ésèy sanz lé soz, pou k’tout i arvyin drwat. Sé inn manyèr d’dir k’i fo atann èk patians k’lo tan i sanz.

La somènn proshèn, gran lantrekoz èk troi zèn group sérié

Oté, la poin po di, nana po ékouté. Bann zèn i amèn maloya i amont anou in zoli voi, zot gayar. Kisa la di na pi Maloya ? La Rwa èk Lélé la fine alé, Baba la pi là, Gramoun Bébé osi. Bonpé noré di « Ala, nout tradision la po mor ». Dawar, té san konté dési bann zèn rénioné, l’arpran la rolèv. Oté, na poin rienk Danyèl po mèt anou anlèr. Nana détroi group sérié la po fane la parole maloya partou dési la tèr. Zot i kroi pa. Ogard kalité romans Destyn i amèn po nou. Mazine osi tout la tradision kabaré Lindigo l’améné. Nior pa non-plï tout le mazinasion Nono léna dan son group Kiltir. Le diskèr i koné pi ousa mèt son tèt, i paré, sitantèlman Kiltir i vann an fors son dernié CD. Afol pa marmay, zot boush lé an lo. La somèn proshèn, nout kadr sora rézervé po la zénèss maloya. Kit amoin alé rod azot, dan zot kour. Banna va dir anou, koman zot i voi lavnir nout mizik tradisionèl La Rénion.

Bbj

Kabarèr !

Mikaèl Kourto i vienn fé sorti son dézièm liv fonnkèr “Kabarèr”. Apré “Karozin”, li amèn anou dann in ron, son ron fonnkèr. I amiz la boush, kom ki diré. Parlfèt, zot i pé trouv liv-là dann farfarliv zédision K’A, oubiensa dan tout bon libréri. Akoz, kréol pa in vré lang kosa ? Dan ti liv-là, fasil po lir (i abim pa le zié), zot va voiyaz dann fon le kèr poèt-là, palanké rant Paris èk La Rénion, li viv par isi astèr. Mi di arpa zot tout, soman alala in zartis angazé. Désertin va dir : « domaz le tit liv-là i resanm inpé sat Babou B’Jalah la po ékrir ». Kabarèr ? Fonnkèr en pays Kabar ? Non, lespri i tonm pa parèy, kinm banna là i tonm dé dalon fonnkèr. Antouka, fé pa la bil, alé boir le mo Mikaèl la ékri.

J. T.