Lo zour-la, lo zène prince Sacatov lavé éloigne in pé son volaz pou suiv’ la trace in gazel. Li lavé laisse dèrière li lo bor gran rivière Zanbez. Tou d’in coup’ in pti désord’ la fait saute ali. Li la court caciète dèrière in pié kapok. Laté in troup armé ec band’ zarme étranz qué té y brille dan’ soleil.

Zistoment lo band’ boug té y dirize coté lo pié d’bois pou enpare in pé soleil sous lo feillaz. Pa posib couri : dèrière Sacatov rien qu’ gran gran zépine ; dovan li, la savane ou-ça li nauré pi disparèt com’ in serpent en glissant en travèr lo gran zerb... Solmant lavé lo troup armé. Son kèr té y congne for mèm. Pou di vré, band’ boug’-la té y rossenb’ in l’équipe çassère zesclav que té y sorte la cote Mozanbik pou souque nouvo bra-for. Par zot linze, Sacatov té y roconé.

Wala coment Sacatov la rotrouve ali ec la çaine dan’ pié. Dèrière li, li la laisse souvnir lo bon tenp lerk li té marmail, lo tribi ou-ça li té si lo point èt’ nomé roi, souvnir touça trazé li lavé couri dan la brous’.

La vend’ ali senb’ in trafikan-caf qué té y sava pays Bourbon. Cé com’ ça qu’in zour, en plein séson la çalère, au milié d’aut’ malhéré com’ li, Sacatov la débarque si la plaz Sain-Pol. La partaze lo band’ zesclav par ti tas. Epi Sacatov la tonb’ si lo propriété Méssié Deni, dan’ Bernica.

Lo zène caf laté en plein dan la force son l’az. Son caractère laté zenti, son l’espri laté vif. En vites’ li la aprand’ langaz créol. Son mait’ la rossenti l’amitié pou li, parce que sans tardé li la roconi lo boug’ lété intélizent. En détrois an, Sacatov lé devni comandèr si lo propriété. Ec son l’espri fin, li lavé presque pa besoin enserve çabouk. Li lavé lo manière comandé dan lo sang ; san viré-tourné li la comence domine lé zaut’ zesclav que la soubaltère ali épiça la prend ali com qu’y diré pou zot cef.

Tout té i roule pou lo mié, épi nauré pi continié com’ ça... Solment wala : Sacatov lavé lo kèr renpli ensenb’ in passion san l’espoir. Parlfèt, lerk Sacatov lavé mèt lo pié si lo propriété, lo fille Méssié Deni, Inèle, laté apré promené d’in démarce tout’ en douce-ivres’. Lo zié lo zesclav laté tou d’suite bloui par lo cévé coulère l’or brillan lo zène fille. Zamé d’la vie li lavé bite si in l’ocasion admire in merveil’ pareil. Le po fille-la laté com’ velour la po pèce ; son rogar fré-fré lavé la coulère grain sapoti. Pou lo promié fois, lo kèr Sacatov la renpli épi la débordé senb’ l’amour en plis’ l’admiration. Pli d’in fois li la place ali si lo cemin la bel, mais zamé çad-la la lève lo zié si li. Senb’ pou li, lo zène fille té y voit mèm pa son présence... Com’ si li té y éxis’ pa pou el. Souvendéfois, li té y arèt dobout’ dovan la varang’, caciète dèrière bougainvil. Lo zène fille té apou brodé, sinon-ça apou révé, lo corp amoli dan son fotèy sans mèm aperçoit lo rogar enflamé que té y suiv’ le moind zès’ el té i fait.

Epila, in zour, Sacatov la disparèt. Quamèm la rode partou, la pa trouve son trace.

In matin, lo nénène la pa rotrouve lo mamzèl dan son çanb’. La trace, com pou di domoun’ lavérézinbé, lavé poin ditou. Rien qu’la marque lo pié dosou lo fénèt que té y done si lo zardin, nauré pi di domoun’ lavé passé par-la pa tro lontenp avan. Lo linz’ senb’ lo band’ zéfé d’toilèt lo zène fille laté pi la aussi. Com’ dan lo cas Sacatov, la i bo rodé... in tiok.

Té com’ si lo zène fille lavé disparèt dan lé z’air.

Queq’ tenp pli tar, in zour ou-ça lo Gro Blan lavé décend en vil pou règ’ détrois zafair, tou’ lo mèb lo zène fille lavé disparèt com’ si in pti quéquène lavé azi la mazi. Persone la pa vi band’ volèr. Dan’ fon, dan’ fon la foré mèm, dan in paillot’ rocouvert’ senb’ feil latanié, lo zène Inèle la rouvert lo zié, la romèt in pié dan la vie, apré in l’engourdisment que lavé dire pa loin in sièc’. Son zié étoné la pose posé partou alentour d’el. El lété alonzé si in lit fouzèr. Lo mir la case tapissé ec in gran quantité flèr. Coté el, in panié renpli lo fri, épila, pli loin, assiz, costé cont’lo pié lo lit, Sacatov. Lo boug té y ogarde ael en silence, lo kèr ragoulé ec la boté ce figuir que li lavé pa nabou oblié. Lo zène fille la bouze in coup. Sacatov la vni pli pré. Li la tonb’ aznou épi la di, la bouce renpli ec la tendres’ :

- Pardon maitrès
Lo mamzèl la pa répond’. Son rogar laté glasé, débordant ec mépri.

- Mi domand’ aou pardon, mais moin té y aime zou si telment. Moin té y
gaingne pi viv sans voir aou.

- Acause ou la parti ? Ou té pa bien traité ?

- Oui ? maitrès’, mais Sacatov té y vienpabou viv ançainé. Li lavé besoin la
liberté. Acetèr, amoin lo cef in l’équipe que lé paré pou mort pou moin. Mi aime aou, maitrès. Aou, wa aime amoin in zour ? Dan mon pays moin lété prince.

- Espèce toqué, va ! Gandia la monte dan’ out tète ? Ramène amoin la case.
Moin va pa di rien, ma domand’ mèm pardon pou ou.

- Sacatov la pa besoin pardon persone. Acetér, cé li lo mait’ ! Wa rès’ la,
ziskatan vi aime amoin.

Lo zène fille la largue in gran crié dépité d’la vie, épiça la tonb faiblès. Sacatov la sorti. Dé-trois fem’ la vni épi la okipe lo mamzèl.

Lo tenp la passé. Inèle té y manque ar-rien. Sacatov, tou lé zour, té y ofert ael band’ flèr li lavé ramassé, çaq li lavé trap la ças’, sans-ça çaq li lavé trap la pèce. Lo moind’ ti désir lo zène fille lété exocé, pli mié encor que pou in Reine. El lavé lo permission promène dan lo zalantour. De la, el té i aperçoit la tète band’ montagne. Lo band’ boucan lété en plein milié in gran foré tamarin ; alor, ar-rien qu’çaq té y coné sentié nauré niabou débis’ lo cacièt’ band’ maron.

Lo soir, Sacatov té y çante ène-dé romance tris’ en faisant souplaingne son bob.
Six mois la passé com’ ça.

Mais lo zène fille té y dépéri. Son po té y blémi. El té y manze pi. Sacatov laté tracassé pou son l’éta. Li té y voit bien Inèle lété malhérez. Alor in zour, Sacatov la di ensenb’ Inèle :

- Maitrès, domin, ma ramène aou out’ case.
Li té y coné té riscab y trap ali épila y té tié ali.

- Si ou fait ça, ma plaide pou ou, ma domand’ out pardon.

- Non, maitrès ! Parce qu Sacatov naura pi la limère soleil pou claire sobn zié.
Lo lendmin soir, lo gro-blan té apré fimé sous la varang’, lèrk tou d’in coup li la pèrci com’ in forme blan. Té Inèle que té y artourne. Sacatov la disparèt dan la foré.

Quèq tenp apré, wala pa qu’lo zardiné étoné, y voit pousse in l’espèce ti pié d’bois étranz ! Promié fois li té y voit ça. Zis’ en face la fénèt’ la çanb mamzèl Inèle. Laté in pti pié d’bois, feil coment zétoil. Band’ promié feil, dison té y arprésente com’ flèr, rouz parèy la flam’, rouz pareil do fé. Lo flèr la dore six mois épi zapré, tou’ lo band’ feil la roprend zot coulère vert-vert. Tou lé z’an, com’ pou rapèle lo diré lo floréson son l’amour, lo plante y clate en flam’ pendan six mois.

Wala coment lé né « manioc flèr » que décertin y dénome aussi « flèr six mois ». Lerk vi casse in feil’ lo pti pié d’bois y plère larme do lait, com’ pou amont’ son doulèr.

Conte : Hoarau I. « Sacatov » in Contes et légendes de l’île de la Réunion, traduction de Daniel Honoré, Editions Orphie, Gérard Doyen, Paris, 1987, pp. 53-56.