Marmay alé pa rakont sà partou
Domoune va kroir aster sé zot la fine nir fou
Si mon kozman lé mantèr la pa moin lotèr ditou
La mantri la pass partou ek son gran kamionèt
Po el vann tout son bazar la rakont in paké d’krak
La mélanz luil ansanm lo po el gin-ye la kantité
Moin la tonm dan son défo moin l’ashèt tout lo paké

KRIKÉ !
KRAKÉ !

Po moin giny koskoté soley à lorizon
Moin la parti la plaz té anviron sizèr
Astèr po fer son fion, tazantan, lame-la mer
I vien digdig mon pié té an lakordéon
Si la plaz, dan la sab, navé ankor marmay
Té po zoué dan lo soir, mi di pa kel pagay !
Bann niaz antasé konm in troupo d’bizon
Té po ral in ler fré dan lo siel Zaviron

Napoin persone la vu kisa la lans sagay
Mé toudinkou aster marmay l’arèt batay
Dan lo ker-in marmay na zimaz an takon
Ti Milien aterla la sort inn pa kouyon :
"Laba à lorizon dedan son san kayé
Soley la po noyé, la po mor po toulbon
Minm si la mer aster el sé pa sa momon
La mer lé an koler konm in monn tourmenté
Taler pli for ankor kan la oul va monté
Sak la fé sà terla va domann son pardon"

Lannmin zournal la titré : Kou d’sagay Tansalé
Lartik té pa long mé té an promié paz
Bann sak té tro sansib la sort là ek la raz
An foto : ’si la mer navé in soley ’trinn koushé

Kou d’sagay Tansale’

Iérosoir Tansalé aproshan le sizer
Soley té po désann konm "alakoutumé"
Vi di pa toudinkou soley i disparé !
Konm in moune lété là, la volatilizé
Poin persone la antann kan sagay la fiaké
Poin persone la vu kan sà la filoshé
Navé in bann marmay dan la sab té po zoué
Mé zot té pa ek sà kan tousa l’arivé
Granmatin lo mister lé ankor toutantié
Lo kor la disparu à la nuite dan son san
Minm lo san aprésa li la évaporé
Sak la parti la shas po zot rode lo sagay
Zot la rantré "bredouille" kan bardzour la kléré

Sinié Bizon futé

(Si défoi la polis i mèt sà si zot kont
Lo bann bizon aster la parti an fumé
La Vérité dan tousa sra zamé dévoilé
Na in boug Tansalé lo koko la bloké
La trap sagay afrikin akroshé dann salon
In sagay fabriké dan la tribu Dogon
Daoir li la vol sà okour d’in safari
Li la aminn son kaz zis po sà fer zoli
Po li pik in bizon li la lans sà dann siel
Sagay-là la vni fish anplin dann ker-soley )

Moralité :

Soley i lév à Lorian, li koush à Loksidan
Si la koush-l’oxyde de fer ’si in sagay Dogon
Volé okour d’in safari la po rouy ot pansé
Lès sagay-là an pé dann salon konm "Trophée"
Alé pa tié soley po in Bizon Futé
Lé kapab disparèt toudinkou an fumé
La mantri la pass partou ek son gran kamionèt
Rosor i krak i grinss, tazantan minm i rouspèt
Kan léshapman an foutan la po bèz rienk kou d’pèt

Jean-Paul Cadet

Jay Surya ! Jay Ananda ! Suryananda ki ... Jay !